رح إنتخب … جناح عبيد
كرمال العيون اللي راحت ع بواب مجلس النواب،
رح انتخب...
كرمال ولاد شهدا ١٧ تشرين، ما حدا يقل لهم "بيّكم راح ضيعان"،
رح انتخب...
كرمال أطفال ٤ آب،
والأطفال اللي هربانين من "جهنم"، ع وجه المي، لأن العصابة كتبت مصيرهم "يا حريق، يا غريق"،
رح انتخب...
كرمال السنتين ونص قهر، جربنا فيهم كتير، وما قدرنا نرد حقنا، لهلأ،
رح انتخب...
كرمال ولادي اللي انجبروا يكبروا بكير، يعتلوا هم ويحسبوا معنا بكير،
رح انزل وحط ورقة،
بعرف انها يمكن ما تكفي،
بس لما بعدين يسألوني "طب شو عملتوا انتوا؟"،
خبرهم انو جربنا كل شي، لحد ١٥ أيار، بدون ما اضطر خبي عيوني من عيونهم...
أنا من اللي قرفوا من كل الأغلاط والأنانية والعناد اللي خلت صوت الناس يخف ويضعف يوم عن يوم ووصلتهم للانتخابات مشرذمين،
بس بعرف انو هالأخطاء سببها مشاكل نفسية واجتماعية مغلغلة ببلدنا وموجودة بأغلب الناس،
وبعرف كمان،
انو الاوادم بهالبلد دايماً مترددين وراخيينها ويللي بدكم،
بوقت بتبقى العصابات موحدة وصلبة، بيجمعها الشر والطمع وجنون السلطة والخوف من الناس...
كرمال هيك رح انزل،
حط على عين كل اللي مراهنين من اول يوم انو شو ما عملوا، ما حدا رح يحاسبهم،
لأن بإيدهم العصا والمال وكتير من الاعلام،
وفيهم يضلوا يخنقوا الناس بالجهل والخوف واليأس وقلة المروة، "سرطان" الشعب العنيد...
يللي بدو يقعد ببيته ب ١٥ أيار، ويضل ينق ٤ سنين بعدها، حر،
بفهمه...
ويللي بدو يوقف بوج كل مين دق بكرامته ومستقبل ولاده وأكله وشربه وصحته ومصرياته، وحرمه الدوا والكهربا والماي والبنزين والغاز وربطة الخبز،
بعد عندك ١٥ أيار،
فرصة يمكن ما تتكرر لبعد أربع سنين،
أو أكتر...