لمناسبة عيد البيّ بدّي وجّه ملاحظة صغيري للمسؤولين الدينيين والإجتماعيين عن ه العيد العظيم ، مناسبة ه العيد بتمًّرْ ع السكيّت مع العلم إنو باقي الأعياد بتاخـد طابع شمولي وصدى واسع بين كل الأعياد ، لها العيد طعمي خاصة لأنو البيّ كل الدني ورمز للحياة الجديدي وللخصوبي وللقداسة ، وقدّيش قي بيّات تعبوا لنحنا نكون بموقع ممتاز بمجتمعاتنا .
صحيح الظروف صعبي ، ولكن بها النهار العظيم واجب ع كل واحد منا يلتفت ويقول لبيّو ولكل بيّ وين ما كان شكرا من القلب يا بيّي يللي إنتْ مارست أكتر من مهني وإشتغلت ليل مع نهار لتأمين كل حاجياتنا ، ولازم نحيّي كل بيّي من بياتنا إللي قدّموا أثمن التضحيات ليبقى الأمـــل والحب مزروع في قلوبنا .
أنا من منطلق محبتّي لبيّي ولكل البيّات إللي تعبوا وجنوا وسهروا وضحّوا بدّي أطلب من كل حاكم عندو ضمير وشاعــر بتعب أهلو عليّ إنـو يعلن 21 حزيران يوم عالمي لعيد البيّات ويكون ها النهار مناسبي للتعبير عن شكرنا والإعتراف بالجميل لجهود بيّاتنا ونتذكر مآثرهم ونحتفل بالعيد بكل دول العالم ، وميشان هيك بدي أعمل مذكرة بإسم المؤسسة ووجها للأمم المتحدة ليصير يوم العيد "يوم عالمي " لأنو البيّيات ما بتتكافى .
"سونورا "بهيدك الإيام لمّن كانت بالكنيسي وسمعت وعظا عن عيد الإم شعرت بقوّة أن الأبوِّة بحاجي للإعتراف بالجميل ، وخصوصي لمن بتكون بتكِّن التقدير العظيم للوالد اللي ضحّى وربّى ، وه البنت إللي حبّت بيها لأنو "وليام جاكسون" هوي الرمز اللي بعد ما توفت مرتو ربّى عيلتو ووهب نفسو من أجل راحتها وخيرها وتقدمها ... هوي البيّي المثالي وكل البيّات بيستحقوا ذكرى عظيمي متل نهار عالمي لعيد البيّ .
بيّي موسى ، إنتْ ومع إمي نوال علّمتني كون رجال وشجاع قدام كل التحديات إنتْ إللي قطعتْ طريق الشر لتفتح طريق الخير والمحبي والأمان ، إنت إللي علمتني كيف حب الوطن – الناس – الأهل ، إنت إللي علمتني حب تراب بلادي وإزرع الخير بترابنا المقدس ، إنت إللي تعبت لوصلتني لهون ، إنت لولا عرق جبينك إللي كان ينقط عنفوان وكرامي وعزة نفس وطهارة وسلام ما تخرجت برتبة شرف ولولا منك ما صرت رجال ، إنت يا موسى بيّي نور الدني والحياة ، ومن مطرح ما إنت صليلي ت كفي المسيرة .
بيّي موسى هوي اللي خلاني شوف وحس معنى الرجولي ، وكل ما بتطلع بالمرايي بشوف عيونك يا موسى المخلصا والمكافحا والمناضلي من أجل السلام أول شي ومن أجلي ومن أجل إخوتي .... من أعماق قلبي يا ريّس موسى بشكرك لأنك أظهرتلي جوهر الرجال الحقيقي وإنت المثال الأعلى إللي بفتخــر في ... موسى بيّي إنت السبب إلي جعلني إنسان مميّز بحياتي وإنت ونوال أغلى ما بملك بها الدني ... موسى إنتْ بطل قصتي بها الحياة ... موسى بيّي بوعدك إنو على الرغم من القهر والشوق حاسس إنك رح تستقبلني بأحضانك وإحضان نوال وكل الأهل كإبن بليق ب بيّي متلك وإلى اللقاء يا موسى بيّي .
الدكتور جيلبير المجبِّرْ
فرنسا في 21 حزيران